كتب- أحمد عبد العليم
استنكرت الفنانة عفاف مصطفى عدم مشاركتها في مسلسل وسط البلد الذي حقق نجاح كبير، وذلك عبر حسابها الرسمي بفيسبوك.
وكتبت عفاف مصطفى: ليه ماشتغلش في مسلسل وسط البلد؟.. بتواصل مع مخرجينه ومديرين انتاجه من ساعة تحضير اولي حلقاته ولا من مجيب.
وتابعت: عدد اللي اتصور 190 حلقه ومتوقع 384 حد يهتم بسؤالي من القائمين عليه وشاكره افضالهم.
كما استمرت الفنانة في التساؤلات حول عدم مشاركتها في هذا المسلسل، بالرغم من طرق جميع الأبواب للقائمين عليه، وكتبت في التعليقات: والله مافاهمه في ايه.. هو حكر علي ناس معينه ولا في ايه؟ بيصعب عليه اتواصل معاهم من ساعة تحضير اولي حلقاته لغايه النهارده والمخرجين بتوعه حوالي 3 او اربعة.
وأضافت: لأنه اجزاء وتواصلت معاهم ومع كل مديرين انتاجه وبتزنقوا ساعة التصوير بممثلين مرتبطين باعمال تانيه ويحصل لهم ضروب بسبب زنقة الممثلين.
واستكملت عفاف مصطفى كلامها: طب يا اهل الخير بقولكم خلوني حتي لساعة لما تزنقنوا انا سداده الحقكم برنة تليفون وده مش تقليل مني لنفسي لا ده تواضع وحب لمهنتي والقائمين عليها.
واختتمت الفنانة كلامها: اتمني صوتي مع الرساله دي توصل لشركة الانتاج والمنتج.. والله الموفق.
وعلى الفور استجاب لها المخرج أحمد شفيق خرشيد الذي علق على المنشور: ليه انتي كلمتيني وانا مرديتش.. ابعتيلي رقمك وانا اللي حكلمك.
وأيضًا الممثل ومخرج الحركة يوسف سليمان، الذي كتب لها: ما انا بتواصل مع حضرتك مش بتردي عليا يا فنانة.
وكان ردها عليه: تليفوني موجود في كل شركات الانتاج وغير كده انا ماسكه التليفون ومربوط في ايدي عشان ببقي منتظره رنه تليفون ممكن تكون فيها خير وشغل لي.
